العطَّار و مولات المسمن

Discussion dans 'Nouvelles (9issass 9assira) & Chroniques' créé par dul2, 27 Décembre 2013.

  1. dul2

    dul2 salam alikom

    J'aime reçus:
    5698
    Points:
    113
    :Dللكاتب بولحية ملك القافية

    كنت غادي للخدمة وأنا نحس براسي مقطوع !!
    باغي نفطر وفيا الموت ديال الجوع !!
    الحال مشا عليا وللدار ماكاين رجوع !!
    قلت آش ندير آ سيدي ربي وراسي مرفوع !!
    وهو يبانلي مَحال يدير من الأكلات كل نوع !!
    دخلت ليه أنا حلِّيت فمِّي وبقيت مخلوع !!
    آش هاد الخيرات وگاع بنادم تما مجموع !!


    دخلت عندهم وبديت بالسلام !!
    لقيت تمَّا خدَّامة ماشي خدام !!
    وبقيت بين التعجب والإستفهام !!
    تعجبت أنا وتلفات لي الهضرة والكلام !!
    وسهيت شوية سرحت وبديت فالتخمام !!
    غي مرأة تبارك والناس عندها بالعرَّام !!
    إيوا لي نقول هو الله يبعد عليها ولاد الحرام !!


    مشيت عندها طلبت برَّاد أتاي !!
    و 2 مسمنات ودرهم حرشة والميلفاي !!
    وقلت ليها صاوبي داك شي كثْري وتهلاَّي !!
    و خلِّيهم ليا فوق ديك الطابلة هاني جاي !!
    وهاكي الخلاص ديالهم دابا غي تهنَّاي !!
    خرجت نهضر مع صاحبي أحمد البنَّاي !!
    جا و وقفنا شوية حدا مول الدِّيطاي !!


    ساليت صافي ورجعت من الزنقة !!
    هي كانت تغسل الكيسان وتشقا !!
    لقيت داك شي محطوط والمسمن ملوِّي فورقة !!
    قريتها بالزربة وهي تبانليا نمرة زرقا !!
    مكتوبة فداك الكاغط وقلت عندي غادي تبقا !!
    تا نشوف فين غادي نوصل و آش غادي نلقا !!
    ياك بعدا ماشي نصب واحتيال ولا سرقة !!


    ضربت المسمنات والحرشة شبعت وساليت !!
    وقلت ليها صافي بسلامة هاني مشيت !!
    وهي تقول ليا واش صافي بينا سخيت !!
    قلت ليها دابا نرجع راني هنا رتاحيت !!
    شكون يسخى بداك المسمن المذهون بالزيت !!
    جاوباتني أيوا نتمنى داك شي .. يا ريت !!
    واجي مرحبا بيك راه عندي كل ما تشهيت !!


    مشيت شارجيت وعيطت لديك النمرة !!
    وسمعت صوت كنت سمعتو قبل هاد المرَّة !!
    ماخافيش عليا هاد الصوت وهاد الهضرة !!
    ممكن تقولي ليا شكون نتي يا هاد المرا !!
    راه ضرني راسي بحالا واكل شي جمرة !!
    وقالت انا هي لي فطرتي عندها آخر خطرة !!
    مرة مرة اجي تفطر عندااك ضربها بغبرة !!


    آآآ عاد عرفتها هادي هي مولات المسمن !!
    قطعت التيلتفون على داك الصوت لي يجنن !!
    من داك النهار وانا نفكر بزاف و محّْن !!
    يا سيدي ربي لمّن غادي نحكي لمّن !!
    قبل مانمشي تمَّا كانصاوب حالتي ونحسّْن !!
    كانمشي عندها باش نشوفها غي بالفن !!
    وندير السبَّة بالبغرير المذهون بالعسل والسمن !!


    بقيت نمشي نفطر عندها كل يوم !!
    من تكون الشتا ولا يكون الشُّوم !!
    و ولاَّ داك شي واضح بزاف و مفهوم !!
    خوكم مسكين تبلا بعبد الحليم و أم كلثوم !!
    وليت تا انا رومانسي نبغي الشتا والغيوم !!
    وليت نفكر فيها بزاف وديما سارح ومهموم !!
    العطار بين ليلة ونهار ولاَّ يحب ومغروم !!


    سيفطت ليها رسالة :

    حبك نافع بلدي و هواك زريعة الكتان !!
    من نهار عارفتك آ فلانة و أنا فرحان !!
    ديما نفكر فيك مانجلس لا مع فلان ولا فرتان !!
    عينيك كحلين سانوج و فمك عرق سوس !!
    معاك انا مابقيتش نعرف النهار المنحوس !!
    والعرس راه قريب خاصني غي شوية لفلوس !!
    وشحال تعجبني فيك الفهامة يا حنوك الخزامة !!


    هي جاوباتني :

    يا العطار والله كلامك خاطار !!
    ماكرهتش نشوفك أنا كل نهار !!
    ونسمع لهاد الكلام وهاد الأشعار !!
    كلامك مسمن عامر شحمة !!
    من نهار شفتك تلفات ليا الخدمة !!
    بالزربة دخلتي لحياتي وخليتي بصمة !!
    عويناتك حرشة مدهونة نسَّاوني فالعربي مول الطاحونة !!


    قلت ليها :


    نهبل كي نشوف المسمن ولا نشم الريحة !!
    حبك هبلني وعذبني واه يا فتيحة !!
    طيابك بنين وماكلتك مليحة !!
    باينة فيك ظريقة ماشي قبيحة !!
    غرامك نتي دار فيا فضيحة !!
    الله يا ربي الله آش هاد الطيحة !!
    خاصنا نديرو الكتاب ونقراو الفاتحة !!
    ونولدو انا ونتي ذرية صالحة !!


    وهي جاوبتني :

    واه عندك الصح مايدوم غي المعقول !!
    كلشي يمشي بالزربة ويزول !!
    هاد شي قالتو لي مِّي الباتول !!
    و نيشان هذا هو المعمول !!
    يلاه نمشيو بجوج بينا عند العدول !!
    باش قصتنا تبقا ديما و طول !!
    واخا نعيشو غي بالعدس والفول !!


    صافي دازت سيمانة وتلاقينا !!
    تفاهمنا و عند العدول مشينا !!
    درنا فرح بسيط والعائلة فرحو لينا !!
    من داك النهار وحنا بجوج بينا !!
    عايشين غي فبيت وكوزينة !!
    نتقاسمو الفرح والقرح والغبينة !!
    طوّْلنا و ولدنا ولوالدنا ربِّينا !!
    ونطلبو الله يسهل عليكم وعلينا !!

    :Dحب_من_أول_مسمنة
     
    the dreamer, bella999 et RedEye aiment ça.
  2. Nawras

    Nawras سيدي بـرطــال

    J'aime reçus:
    68
    Points:
    18
    هادشي كيڭهم.. تبا للرومانسية المغربية..هاديك هي المرا والا فلا :D
     
    the dreamer et dul2 aiment ça.

Partager cette page