دراري ف Piscine……….

Discussion dans 'Nouvelles (9issass 9assira) & Chroniques' créé par maximo-27, 21 Novembre 2010.

  1. maximo-27

    maximo-27 Ghost

    J'aime reçus:
    224
    Points:
    63
    الصيف هذا والحرارة فالسما فاندكس وصحابو تافقوا يمشيو لبسين نهار لاربع عياو من بيبسي وعين الذياب..هاد صحابو معروفين نبيل ونجيب وعزدين دارو بريكول فالقيسارية كيبيعو بيجامات فالفراشة وعبدو خدم فبوتيك ديال الالبسة النسائية لمزير لحقاش عندو مع التضاريس..نهار لاربع مشي تافقوا عليه غير صدفة ولكن السبب السبت ولحد كيعمر والجمعة كيكونوا فيه صحاب القريعة والحرفة وفاندكس قال ليهم لاربع كيكون بنادم نقي فيه وخا هما لا علاقة بالنقا..معلينا الاستعدادات بدات نهار قبل اليوم الموعودالدرب كلو عرف أنهم غاديين لتما كل واحد كيجي ينصح فيهم اش يلبسو ويفكرهم أنهم سفراء لدرب الطاليان وبوسبير وبوطويل والنواحي.. خصهم يكبروا بالمنطقة ويمثلوها أحسن تمثيل ..ضبروا على الملابس الداخلية والشورطات..الصباح فاقوا مع الستة وفيقوا مول الحانوت يتقداو وبوبريص مول الطاكسي ضيف الشرف فالقصة..جابهم قبل ميحل لبيسين عاد كيسيقوا فيه وريحة جافيل تعمي العين..بقاو عاصرين عليه يحل اول وحدين دخلوا ليه هما.. شي ناس شافهم دارو بالناقص منو داك النهار معذورين..نبيل حبسوه حدا الباب كلو مشرط فذراعو ولبلاصة للي ممشرطاش واشم فيها فيها سمية درية داير لائحة وطنية غير فراسو..عياو معاه وتافقوا ميحيد تي شيرت ..نجيب حيدو ليه شمبرير قالو ليه غير عوم مع الدراري الصغار ولكن متحرش بشي صبي..عبدو كاعي لحقاش خلص بحال لكبار وهو صغير فعقلوا..صباح كلوا كيعومواويغوتوا وأمة كتفرج وليمتر ناجور دايرين استنفار..عزدين كيتلاح بشورط كيخرج بلا بيه تاهوا مسلفوا عند الحداد
    جاهم الجوع جبدو الماكلة فضيحة للي جايب الزعلوك وللي جايب مونادا مخلطة بالروج وللي جابد خبز الدار بايت بالزبدة والخليع وشي حاجة غريبة..كليميني دازت حداهم شمات داكشي داخت ردات للي فكرشها داكشي للي رداتو حسن من الماكلة للي جايبينها..عبدو للي طلع محضر مقارنة معاهم جاب غريبة حاطها فكاغط السكر ونص كيلو ماطيشة قال لك شاف فبرنامج أنها مغذية ومعشية
    واحد الوقت فاندكس شاف دريات لاعبات الرامي بوصنطيحة حط 10 دراهم وقال ليهم الفانكورة..حساب ليه مقمر مع فالدرب..عبدو تابع وحدة كينg عليها نgان ولاد بوسبير "شعرك زوين تقطعيه الله يقطع له الصبعان دوري شوفي فيا تشوفي لعمى.."
    الناس للي خدامين تما نهار كامل حاضين مع هادو دياولنا..نجيب قالت ليه واحد لمرة دير ليا لومبر فظهري بغا يدير زوين فات ليها الظهر لشي بلايص وشنقات عليه..أما نبيل الشرع جبد لومبر بلدي صاوبوا فالدار من الخل والحامض ولحلبة جيهتو كلها خوات بنادم لصق فالحيط والدخان خارج منو.. وصلات 3 لعشية قال ليهم عزدين ندوشوا قبل ميعمر تما عبدو مبغاش لحقاش مخلصين فلوس خصهم يبقاو غير شوفة من نبيل ونجيب خونا تكمش ..الناس فرحوا وأخيرا يتهناو فالدوش بدات المهزلة الصابون البلدي والمحكة خدامة والشعرية وكل أنواع القطاني كتخرج منهم..نبيل سدوا عليه الما والشمبوان فعينيه وبدا يخرج الهدرة الزوينة من فمو كلشي كيسمع..وصلات الستة وبوبريص تعطل عليهم بالطاكسي تافقوا يضربوها على رجليهم شادين طريق كاملة من راس تالجامع الحسن الثاني وفالطريق للي كتلاقا معاهم كتبدل الطريق وتشد صاكها مزيان وصلوا للدرب مع تسعود الليل لقاو أمة كتسناهم فراس الدرب والما والزغاريد من الشراجم والأم ديال واحد فيهم عارضة على الجيران والعائلة بحال ايلا القرد ناجح ليها فالباك..وصلوا عيانين وتافقوا ميقولوا تاحاجة حتا يتافقوا عليها وميضحكوش عليهم لعديان دابا يدوشوا وأخر السيمانة يمشيو للحمام ولكن هاديك قصة بووووووووحدها


     
  2. فارس السنة

    فارس السنة لا اله الا الله

    J'aime reçus:
    326
    Points:
    83
    أش داكشي [22h]
    وجد الرحلة أو ماتكول والو الولاد الدرب حتى أنت<D
     
  3. maximo-27

    maximo-27 Ghost

    J'aime reçus:
    224
    Points:
    63
    al khobz fih ton w el berad maykhtach al gofa li kan di m3aya
     

Partager cette page