رسالة مفتوحة إلى السيد عبد السلام أحيزون

Discussion dans 'Nouvelles (9issass 9assira) & Chroniques' créé par nournat, 29 Avril 2012.

  1. nournat

    nournat Wld l3iyachiya

    J'aime reçus:
    344
    Points:
    83
    رسالة مفتوحة إلى السيد عبد السلام أحيزون​

    سلام تام بوجود مولانا الإمام ؛ أمّـا بعد ؛

    إلى السيد عبد السلام أحيزون الوزير المنتدب لدى الوزير الأول المكلف بشؤو... كيفاش؟ نتا مدير عام ديال ماروك تيليكوم ؟ و راني عارف، بغيت غير نجرّ ليك الشحيمة باش تـﯕـرّ.

    المهم! لقد كنت سيدي المدير العام لشركة ماروك تيليكوم بيخير و على خير حتى جاتني واحد التسافيرة على غفلة ، فحملت معي لابطوب ديال مادام و غير بزز باش خلاّتو ليّا ، خلـّيت ليها لاكارط ناصيونال ﯕـارانطي ، و ذلك لأنني مبلي بالشاط ، و ماشي شغلك هيا صبعطاش، نكون مبلي حتى بالقنوات الإباحية ، إلا بغيتي تنصح شي واحد سير نصح هادوك لّي خدّامين عندك و كايصورو أفلام إباحية مع شعب على ﯕـدّو ، ها نتا بديتي كاطلـّع ليـّا السكـّار
    ما عليناش آسيدي، ولأنّـني سيدي المدير العام و عكس بعض البشر ـ و الهضرة على لـّي حادر عينيه ـ ما عنديش معا التحسريف و التلصاق على بنادم ، فقد قررت أن أحزق للمدام بالمودم طروا جّي ديالها و هو فالحاقيقة ديالكوم، مشيت على وعدي و سعدي شريت كارط دو روشارج ديال عشرين درهم ، إيوا حكّ يا ما تحكّ ، دوزت النمرا ،صيفط لميساج، جاني ميساج ، ديال برافو هنيئا لك راه داز ليك 20 درهم فالصولد ديالك و الزغاريت و النـﯕـّافات و الدقايقية و ما تسمع غير ولد العياشية يا قطيب اللوز خلـّوه إيدوز، و تّصالات يا الوردة و عليك إطيح الندا ، واتااااها واتاها و الله إيلا واتاها ، شفراااتو شفراتو و الله إيلا حزقات ليه بربعميا
    نكدب عليك أنا ما دّيت ما جبت ، ورّكت على كونـيكسيون ، تكونيكتيت ... طيوريكمون ، أما براتيكمون را باقي ما كاين والو، حلـّيت لإكسبلورر ... والو، حلّيت لموزيلا ... والو ، حليت الشراجم ... والو، خوك بقا حال غي فمّو. صدقت هاز داك لبورطابل و كانضور بيه فالدار كي شي مصطّي ، بحال شي واحد هاز صينية و كايضور بيها عاونو الفريق ، الحاجة لوحيدة لـّي ربحت معاكم هيا عرفت راسي نقدر نخدم سرباي فلعراسات ، لمهم هز داك لبرطابل بيد وحدة و طالع للسطح حتى كانتلاقا ولد عمّي، ﯕـال ليا نتا فعار الله ياك لاباس ؟ ﯕـلت ليه را شارجيت 20 درهم و راني كانقلب على الريزو ، ﯕـال ليا نوض على سلامتك أحيزون راه حزق ليك بديك ربعميا دريال ، هادي يومين و لكونيكصيون ما كايناش.
    أنا دابا ما بقاتش فيا ديك 20 درهم لاحقاش الشركة ديالك نعاماس، ديجا واكلاني فكتاااار من ربعميا ، والاكن ﯕـلت معا راسي وايلـّي !!! مـلـّي سّي أحيزون طمع ليـّا فربعميا ؛ إيلاّ وا القاضية عندو مزيرة ، داكشي علاش ﯕـلت نصيفط ليك هاد الرسالة نسولك ياكما نجمع ليك شي 200 ولا 300 درهم نصيفطها ليك فالبوسطة، هاد الرسالة كنت بغيت نصيفطها ليك إس إم إس وا لاكن خفت نشارجي تيليفون و تحزق ليّا بعشرة الدراهم ، شكون عارف ، راه تقدر تكون واصلة فك حتّى لّلعضم، و تكون تبان ليك التنخيمة حاشاك فلأرض ، تّحنا عليها تسحاب ليك واش خمسة الدراهم

    تهلاّ ليـّا فراسك أسّي عبد السلام و إيلا حتاجيتي شي 50 درهم ما تحشمش غير ﯕـولها و نضبّر على خويا . و ما يدّي حد دنوب لاخر، و بالمناسبة راه كاينة واحد المحلبة فسباتة كادّير لهابّي آور نهار الجمعة من الربعة لخمسة ، سير راه كايعطيو زلافة دالرايب و ﯕـاليطة فابور ، حيـّد بعدا غير الجوع راه الجوع كافر​

    إمضاء : فاعل خير... آش آودّي من فاعل، راه مفعول به هدا

     
  2. nassira

    nassira العـــز و النصــر

    J'aime reçus:
    335
    Points:
    83
    kammal 3la khirak a wald-l3ayachiya o kabbar had rissala f size dyal zarbiya o 3alla9ha 7da wizarat a7izone ... Lah yan3alha sal3a klaw lmaghreb kamel o ba9in 6am3in f sarf 20 dh o 100 dh ikheeesss ! :mad: :mad:
     
  3. Caesar

    Caesar iLiverpooLi

    J'aime reçus:
    182
    Points:
    63
    [24h][24h]
    a7ssen message 9ritou f had forum depuis mon inscription <D
     
  4. nassira

    nassira العـــز و النصــر

    J'aime reçus:
    335
    Points:
    83
    had lma9ta3 iji wa3er f chi clip dyal chi oghniya hindiya [22h]
    [MENTION=3493]YSF[/MENTION] sawab lina chi ma9ta3 mossi9i iji m3a had lkalimat bach ndirou clip de l'année 2012 [22h]
     
  5. RedEye

    RedEye - أبو عبدالرحمن - Membre du personnel

    J'aime reçus:
    4153
    Points:
    113
    sir a weldi [MENTION=18]nournat[/MENTION] kif ma fewajti 3lia had nhar, allah yer7am lik lwalidine wye7fad lik douk lawlidate men shrour annass

    [MENTION=1]Admin[/MENTION] 3ti l nournat 200dh dial recharge dial had sh8ar, wella ndir lik in9iilan, ana metnazel 3liiha
     

Partager cette page