نكيتات خفاف ضراف

Discussion dans 'Noukat gentilles' créé par MIMALION, 14 Octobre 2009.

  1. MIMALION

    MIMALION Visiteur

    J'aime reçus:
    439
    Points:
    0


    حمار جات عندو صاحبتو لدار ..لقات عندو صورة معلقة ديال حمار وحشي.. قال ليت ديال من هاد الصورة... قال ليها ولد عمي كيلعب فجوفنتوس


    واحد الدجاجة انتحرت و كتبات ف الوصية ديالها: إيوا شبعوا بضامة البنة


    هادا واحد شرى طوموبيل فيها كمبيوتر. كان غادي صايك وهو يقول ليه الكمبيوتر: إيلا فتي 90 ف السرعة غادي تدير كسيدة. الراجل تنفخ، زاد ف السرعة، عاود قال ليه الكمبيوتر: إيلا فتي 120 ف السرعة غادي تدير كسيدة. الراجل ناض زاد ف السرعة، والكمبيوتر كل مرة كيعاود ليه نفس الهدرة. غير وصلات السرعة 180، و هو يقول ليه الكمبيوتر: الله يرحم باك نزلني أنا هنا خلاص


    واحد مشى عند صاحبو للمدينة ودار ليه صاحبو الفريت ومايونيز. قال ليه: بطاطا واخا، ولكن الزبدة علاش؟


    واحد السبع كلا مرا شارفة وعجباتو... لحقاش مكرملة


    هادا واحد كيقعل بزاف، تلاقى مع واحد صاحبو، سولو صاحبو: باش تغديتي؟ قال ليه: بالحوت. ومن بعد عام، تلاقى بهاداك صاحبو نيت وهو يسولو: وا كي داير؟ جاوبو: مقلي


    هادا واحد مكلخ سول صاحبو قال ليه: علاش الورق ديال الشجر كيسقط ف الخريف؟
    رد عليه صاحبو قال ليه: حيت ما قرا والو ف الصيف


    هادا واحد طلع للطوبيس وشاف واحد البنت جالسة وعجباتو. ضحك ليها وضحكات ليه. غمز ليها وغمزات ليه. مشى عندها قال ليها نزلي ف البلاكة الجاية. هي نزلات وهو جلس ف بلاصتها


    واحد مبوق حيد جلابتو وعلقها. شوية وهي تطيح هاديك الجلابة، وهي يقول مع راسو: الحمد لله مللي ما كنتش فيها


    هادا واحد مكلخ ما كيجيهش النعاس. قال ليه واحد صاحبو: أنا عندي ليك واحد الطريقة واعرة غادي تعاونك تنعس، بقى تحسب حتال 500 وغادي يجيك النعاس. خينا مشى ف الليل و بدا كيحسب، غير وصل ل 199 و هو يجيه النعاس، وهو نيت ينوض وغسل وجهو و رجع للناموسية يكمل الحساب.


    هادا واحد مسيفط ختو تشوف ليه النتائج ديال الامتحانات. اتفق معاها تقول ليه ف التلفون إيلا سقط ف مادة وحدة: سلم عليك محمد. إيلا سقت ف جوج مواد: سلموا عليك محمد و محمد.
    المهم مشات البنت تشوف النتائج وعيط ليها خوها، قال ليها: أ من درا؟ قالت ليه ختو: سلمت عليك أمة محمد كلها


    هادا واحد نشر إعلان: بغيت مرا نتزوج بيها
    الغد ليه وصلوه مية جواب: بغيتي ديالي؟


    هادا واحد مشى للفرماسيان وقال ليهم: بغيت الحليب ديال الدراري الصغار
    قال ليه مول الفرماسيان: أشنو سميتو؟
    قال ليه: مروان


    هادا واحد الراجل بدلوا ليه قلبو بواحد ديال بلاستيك... و هو يتزعط في بانيو


    هادي واحد المرا سولات راجلها: متكدبش علي تصور مت آش غادي يوقع فيك؟
    الراجل: نحماق ونتسطى ألحبيبة ديالي ويخخخرج لي العقل
    المرا: و زعما تعاود تزوج وحدة أخرى؟
    الراجل: إيوا شوووووفي حماقي شنو غادي يقول لي


    هادا واحد سول صاحبو: أشنو هي المواصفات اللي بغيتيها تكون ف الخطيبة ديالك؟
    جاوبو لاخور: خاصها تكون لاباس عليها، وثرية، وخانزة فلوس


    هادو رباعة ديال المكلخين صنعوا طوبيس كيمشي بالعرض باش كلهم يركبو القدام


    واحد طبيب بيطري مشى يخطب واحد البنت. سولو باها قال ليه: واش نتا معروف؟
    قال ليه: وايلي تانتا، ماكاينش شي حمار ف المغرب ماتيعرفنيش


    هادا واحد كياكل بلا مايقول بسم الله. واحد النهار كلا كسكسو بالحرور وهو يهز مونادا باردة و قال بسم الله و شربها، وقال للشيطان: ودابا شوف باش تبرد


    هادا واحد ضرب التلفون لصاحبه حيت مزير ف شي فلوس. هوما غاديين ف المكالمة عادي، حتى جات سيرة الفلوس، غير طلب اللول من صاحبو شي فليسات و هو يرد عليه: الرقم الذي تطلبونه غير موجود، المرجو عدم الاتصال لاحقا


    هادا واحد عروبي مشى للسبيطار و قال ليه الطبيب: خاصك تدير سكانير


    هادو تلاتة مبوقين ركبوا طاكسي. مول الطاكسي عاق بيهم واش ما حاضرينش، ناض شعل الموطور و طفاه و قال ليهم صافي وصلنا.
    اللول عطاه الفلوس
    التاني قال له شكرا
    التالت نزل من الطاكسي و دار لعند مول الطاكسي و سرفقه. مول الطاكسي يسحاب ليه واش السيد عاق بالقالب دياله، ساعة هو يقول ليه: المرة الجاية ما تسوقش بالزربة بزاف


    هادا واحد خينا رجلو ليمنية قصيرة على ليسرية، كان كيتمشى مع واحد البنت شاد معاها الستون فالطريق، و كيتمشى بالرجل ليمنية فوق الطروطوار و ليسرية التحت باش ما يتفرش معا بنادمة. ملي سالى الطروطوار ما لقى ما يدير... ملي بدا تيعواج هو يقول ليها: خوك راه ما كاين غير الهيب هوب



    هادو رباعة ديال المكلخين ف الجامعة كيكتبوا داكشي اللي كيكتبه الأستاد ف السبورة. منين كيمسح الأستاد السبورة، كيقطعوا هوما الورقة


    هادا واحد غادي يشري 10 دراهم ديال الحشيش، بانت ليه سطافيت و هو يلوح 10 دراهم


    هادي قنية مريضة بزاف و ضارها راسها، قال ليها الفكرون: ما تخممش، أنا نمشي نجيب ليك الدوا.
    القنية جلسات تسنى ساعة، ساعتين، حتى داها النعاس. الغد ليه فاقت و الفكرون باقي ما رجع. ناضت طلت من الشرجم لقاته قدام الباب. قالت ليه: طلق راسك، أنا اللي مكلخة معولة عليك.
    قال ليها الفكرون: غادي تحترمي راسك أولا ما بقيتش غادي


    واحد مبوق كيبكي ف السبيطار. سولوه ماله. قال ليهم: لا والو، غير الوالد مات شوية


    واحد المعلم ضرب واحد الولد كيقرى عنده و قال ليه: راه غير عزيز عليا، داكشي علاش كنضربك إيلا ما درتيش التمارين
    قال ليه الولد: كون غير قدرت نبادلك نفس الشعور


    هادو جوج مساخيط. اللول قال للتاني: أنا مسخوط كتر منك
    قال ليه التاني: لا، أنا مسخوط كتر منك
    ناض اللول شاف واحد المرة شارفة دايزة و عطاها قتلة ديال العصا. مشى عند صاحبه قال ليه: شفتي؟ حتى الشارفات ما يزهقوش من بين إيديا
    التاني شداته الموت ديال الضحك، و قال ليه: إيوا شفتي راه هادي مي، و كاع ما فكيتهاش منك


    هادي واحد المعلمة رسمات للدراري تراكتور و سولاتهم واش عرفوا أشنو سميته.
    حتى واحد ماعرفه. واحد شوية وهي تنوض واحد باش يجاوب و الدري تمتام، قال ليها: تر تر تر تر تر تر
    وهي تقول ليه: أنا غير سولتك على سميته ماشي قلت ليك دير ليه أمارش


    دبانة طاحت فكاس ديال الشراب. خرجات منه كتقول: حييييدوا من طريق النسر


    هادا واحد معروفة عليه مكلخ شد الدكتوراة. مشى عند مرته قال ليها: أنا ما عرفتش علاش كلشي كيقول عليا مكلخ، إيوا هاني شديت الدكتوراة.
    قالت ليه مرتة: دق على الخشب.
    الراجل دق على الطبلة. و هي تقول مرته: شكون؟
    قال ليها: جلسي نتيا، أنا نمشي نطل شكون


    هادا واحد مسموم مشى لواحد الجنازة و بدا يبكي يبكي يبكي. سولوه الناس: واش كتعرف هادا اللي مات؟
    قال ليهم: لا، و لكن سمعت بأن البكا كيعدب الميت


    هادا واحد مكلخ مشى عند مول التلفزيونات و قال ليه: عندك تلفزيونات بالألوان؟
    قال ليه لاخور: كاينين
    و هو يقول ليه المكلخ: واخا عطيني واحد خضر


    هادا واحد مولف يتعشى ببيضة وحدة. واحد النهار قالت ليه مرته: اليوم درنا البيض و ماطيشة
    و هو يقول ليها: آرا برع! جوج عشاوات


    هادا واحد ما يعرفش أشنو هي لاراف. واحد النهار كان مقصر مع صحابه ف واحد البلاصة مشبوهة. شوية جات لاراف. صحابه بداو يجريو و يقولوا : لاراف لاراف لاراف. حتى هو بدى يجري يجري يجري حتى وصل لواحد المركز ديال البوليس و دخل. قالوا ليه البوليس: مالك. قال ليهم: كتجري علي لاراف


    هادا واحد مشى لمطعم ف فرنسا، و عيط للجرسون: جرسون، بغيت حريرة عافاك.
    قال ليه الجرسون: باردون؟
    قال ليه لاخور: لا، ساخنون


    حمار قال لخطيبته: إيمتا غادي نتجوجو أ الحمارة؟
    قالت ليه: حتى تعرف تهدر أ الحيوان


    هادا واحد شرى حاسوب (بي سي) باقي جديد، و هو تسولو جداه: أشنو هادا أوليدي؟
    قال ليها: جدة كتعرفي الرابوز؟
    قالت ليه: آه أوليدي كنعرفو
    قال ليها: إيوا راه ماشي هو هادا


    هادوا جوج مكلخين ف الحبس، تفقوا يهرسوا الباب و يضربوا العساس و يهربوا. مللي هرسوا الباب، ما بانش ليهم العساس و هوما نيت يجلسوا يتسناو فيه


    هادو جوج مبوقين. ناض واحد سول صاحبه: شفتي هاديك النملة اللي كاينة فوق الجبل؟
    جاوبوا: إينا وحدة فيهم؟ اللي سادة عينيها أولا اللي حاللهوم؟


    هادا واحد مبوق كيشوف ف صاحبو اللي عندو خالة فوق عينيه, و هي يقول ليه: أربي قول ليا واش هاديك عين عندك أولا غين


    هادا واحد مكلخ، تجمعوا عليه سبعة ديال الشياطين، واحد كيوسوس ليه و ستة كيفهموه


    هادا واحد حول بغا يدبح دجاجة و هو يقطع صبعو. الدجاجة حتى هي حولة غير شافت الدم و هي تبدا تركل


    هادا واحد ناضت ليه السوسة ف واحد الضرسة، و هو يمشي عند الطبيب ديال السنان قال ليه :حيد هاد السنان كاملين، خليها بوحدها كي الكلبة


    أشنو الفرق بين الحولي القاري و الحولي اللي ما قاريش؟
    الحولي اللي ما قاريش كيقول: ماااااء
    :الحولي القاري كيقول
    H2O


     
  2. ID^^

    ID^^ Accro

    J'aime reçus:
    375
    Points:
    83
    mima 7tta ntiya m9iyda f dak lmountada? [22h]
     
    1 personne aime cela.
  3. MIMALION

    MIMALION Visiteur

    J'aime reçus:
    439
    Points:
    0
    hhhhhhhhhh al fadle tayrja3 lik ;)
     
    2 personnes aiment ça.
  4. prince d'amour

    prince d'amour ZaKaRiA

    J'aime reçus:
    210
    Points:
    63
    lakherin fehmanahom ou dehakna 3lihom ou hadi maleha <D

    hhhhhhhhhhhhh yhafdek a lwalida sba3 <D
     
  5. MIMALION

    MIMALION Visiteur

    J'aime reçus:
    439
    Points:
    0
    temma fine kayen da7ke (da7ke 3lia)
     
  6. miss--caramelle

    miss--caramelle Visiteur

    J'aime reçus:
    1
    Points:
    0
    merci mimalion ^^
     

Partager cette page